12 тамыз күні халықаралық Жастар күні екені баршамызға аян. «Жайдарман» бірден-бір жастар қозғалысы болғандықтан, бұл айтулы мерекені ерекше атап өтуді жөн көрді. Аталған мереке қарсаңында Елордамыз Астана қаласында «Жастар» жазғы жайдарман фестивалі өтпек. 4-9 тамыз күндері өтетін фестивальге және фестиваль аясында өткізілетін шараларға кез-келген жайдарман тобы қатысып, кез-келген адам көрермен бола алады. Ең басты айта кететіні, бұл республикалық деңгейде өтетін фестиваль, яғни кез-келген облыс, қала, аудан, ауыл, мекеме, оқу орны, көшенің жайдарман тобы «Жастар» фестивалінің қатысушысы атануына мүмкіндігі бар. Ол үшін әдеттегі «Маусымашар» фестиваліне тіркелгендей тіркелсеңіз жеткілікті: әуелі www.jaidarman.kz/tirkelu арқылы, кейіннен Астана қаласына келгеннен соң «Қазақстан КВН Одағы» РЖҚБ кеңсесінде.
Фестиваль барысында тек «Жайдарман» ойынымен қатар түрлі шаралар ұйымдастырылатын болады. Олардың қатарында: ашық фестиваль, семинар тренингтер, би батл, би кеші, асық ойнау, айтыс, «ақсерек көксерек», әлеуметтік желі сайыстары, семинар, Домбыра PARTY, футбол, бауырсақ жеуден сайыс.
Фестиваль барысында өтетін шаралар кестесін ұсынамыз:
| 4 тамыз | Командалардың келуі. Тіркеу |
| 5 тамыз | Редактура I тур. Семинар тренинг. Футбол. Айтыс. Би батл. Ақсерек көксерек. Бауырсақ жеуден сайыс. Әлеуметтік желі сайыстары |
| 6 тамыз | Редактура II тур. Республикалық Жоғары лиганың жартылай финалына ҚОСЫМША ЖОЛДАМА иегерлерін анықтау сайысы. Домбыра PARTY |
| 7 тамыз | Редактура. Жиналыс. Әлеуметтік желі сайыстары. Ашық фестиваль. Би кеші. |
| 8 тамыз | Басты дайындық. Гала концерт |
| 9 тамыз | Командалардың қайтуы |